I. Kronoloġija tal-istabbiliment tar-reġistru nazzjonali
i. Meta twaqqaf?
Ir-Reġistru Kummerċjali (id-Dipartiment tar-Reġistratur tal-Kumpaniji u l-Proprjetà Intellettwali (Tmíma Efórou Etaireión kai Dianoitikís Idioktisías)) huwa aġenzija statali u huwa marbut mal-Ministeru tal-Enerġija, il-Kummerċ u l-Industrija. Ir-reġistru nazzjonali jinkludi l-organizzazzjonijiet kollha rreġistrati mill-1923. L-ewwel kumpanija barranija ġiet irreġistrata fl-20 ta’ Ġunju 1923. It-taqsima “Kumpaniji” (Kládos Etaireión) inħolqot fl-1924, bl-ewwel kumpanija rreġistrata fl-20 ta’ Mejju ta’ dik is-sena. It-taqsima “Sħubijiet u Ismijiet Kummerċjali” (Kládos ton Synetairismón kai Emporikón Eponymión) inħolqot fl-1929, bl-ewwel sħubija rreġistrata fis-26 ta’ April ta’ dik is-sena u l-ewwel isem kummerċjali fit-3 ta’ Mejju 1929.
ii. Meta ġie ddiġitizzat?
Fl-2013.
iii. Liema hija l-leġiżlazzjoni applikabbli attwali?
- Il-kumpaniji domestiċi u barranin huma rregolati mil-Liġi dwar il-Kumpaniji (O perí Etaireión Nómos) (il-Kapitolu 113).
- Is-sħubijiet u l-ismijiet kummerċjali huma rregolati mil-Liġi dwar is-Sħubijiet Ġenerali u Limitati u l-Ismijiet Kummerċjali (O perí Omorrýthmon kai Eterorrýthmon Synetairismón kai Emporikón Eponymión Nómos) (il-Kapitolu 116).
- Il-kumpaniji Ewropej huma rregolati mir-Regolamenti tal-2006 dwar il-kumpaniji pubbliċi Ewropej b’responsabbiltà limitata (SE) (l-Att Amministrattiv Regolatorju Nru 290/2006).
- Il-gruppi Ewropej b’interess ekonomiku huma rregolati mil-Liġi tal-2012 dwar il-Gruppi Ewropej b’Interess Ekonomiku (il-Liġi Nru 161(I)/2012).
II. X’informazzjoni joffri r-reġistru kummerċjali?
i. Min għandu d-dritt li jaċċessa r-reġistru?
- i. Min għandu d-dritt li jaċċessa r-reġistru?
Kwalunkwe parti interessata tista’ taċċessa r-reġistru u tikseb informazzjoni dwar kumpaniji domestiċi u barranin, sħubijiet, ismijiet kummerċjali, kumpaniji Ewropej u gruppi Ewropej b’interess ekonomiku.
Kulħadd jista’ jistabbilixxi online jekk organizzazzjoni partikolari hijiex elenkata fir-reġistri tad-Dipartiment u l-istatus tagħha.
Fir-rigward tal-kumpaniji Ewropej u l-gruppi Ewropej b’interess ekonomiku, ma hemm l-ebda funzjoni ta’ tfittxija elettronika iżda tista’ ssir tfittxija fiżika fl-uffiċċji tad-Dipartiment.
ii. X’informazzjoni joffri r-reġistru tan-negozju?
(a) Liema tipi ta’ data jiġu maħżuna (entitajiet imdaħħla fir-reġistru pubbliku, informazzjoni dwar l-insolvenza, rapporti finanzjarji, eċċ.)?
L-informazzjoni li ġejja tinħażen fir-Reġistru Kummerċjali:
- id-dettalji tal-kumpanija, bħall-isem, id-data tal-inkorporazzjoni u l-uffiċċju reġistrat;
- l-istatus tal-kumpanija, jiġifieri jekk tkun irreġistrata, maqtugħa, stralċjata, f’likwidazzjoni jew taħt ġestjoni;
- kapital azzjonarju awtorizzat u kapital maħruġ;
- dettalji tad-diretturi, is-segretarju u l-azzjonisti.
- l-għadd ta’ ishma miżmuma minn kull azzjonist.
(b) Liema dokumenti jiġu sottomessi/maħżuna (fajls, kollezzjonijiet ta’ dokumenti, statuti, minuti tal-laqgħat ġenerali, eċċ.)?
Id-dokumenti u/jew l-informazzjoni li ġejjin sottomessi lir-Reġistratur tal-Kumpaniji jew reġistrati miegħu huma ppubblikati f’forma elettronika fir-Reġistru Kummerċjali u jissejħu “informazzjoni obbligatorja dwar l-iżvelar”:«»
- id-dokument tat-twaqqif u l-istatuti tal-kumpanija;
- kwalunkwe emenda għad-dokument tat-twaqqif u l-istatuti;
- wara emenda għad-dokument tat-twaqqif jew l-istatuti, it-test tal-verżjoni l-ġdida tad-dokument emendat;
- iċ-ċertifikat ta’ inkorporazzjoni u kwalunkwe bidla fl-isem;
- id-dettalji tal-ħatra u tat-tluq u l-informazzjoni personali tal-uffiċjali, inkluż kwalunkwe bidla f’dik l-informazzjoni;
- ir-rapport annwali u d-dikjarazzjonijiet finanzjarji;
- id-dettalji tal-uffiċċju reġistrat u kwalunkwe bidla fihom;
- kwalunkwe bidla fil-kwartieri ġenerali tal-kumpanija;
- kwalunkwe ordni ta’ likwidazzjoni, tkomplija tal-likwidazzjoni taħt is-superviżjoni ta’ qorti, jew sospensjoni ta’ likwidazzjoni;
- avviżi ta’ ħatra ta’ likwidatur u d-dettalji tal-likwidatur;
- id-dissoluzzjoni u kwalunkwe ordni ta’ dissoluzzjoni;
- kwalunkwe riżoluzzjoni ta’ stralċ volontarju;
- ir-rapport tal-likwidatur wara laqgħa finali;
- it-tneħħija ta’ kumpanija mir-reġistru;
- kwalunkwe rapport jew ċertifikat dwar il-kapital;
- kwalunkwe rapport ta’ għotja ta’ ishma;
- notifikazzjonijiet oħra illi huma mitluba mil-liġi.
iii. Kif nista’ nagħmel tfittxija (u x’inhuma l-kriterji ta’ tfittxija disponibbli)?
(a) Fiżikament
- L-informazzjoni dwar l-organizzazzjonijiet reġistrati hija disponibbli direttament mill-uffiċċji tar-Reġistratur tal-Kumpaniji u l-Proprjetà Intellettwali, li jinsabu f’Makariou u Karpenisiou, Xenios Building, 1427 Nicosia, Cyprus.
(b) Fuq is-sit web tar-reġistru
- L-informazzjoni tista’ tinsab fuq il-portal web tar-Reġistratur tal-Kumpaniji:
(c)X’inhuma l-kriterji ta’ tfittxija disponibbli?
- Biex tagħmel tfittxija, l-ewwel ikklikkja fuq il-link tal-portal imsemmi hawn fuq. Imbagħad ikklikkja fuq “eServices”, imbagħad “eSearch in Business Entity’s Registry”. Din tieħdok fil-funzjoni tat-tfittxija.«» Kullħadd jista’ jfittex organizzazzjoni partikolari billi jdaħħal l-isem jew in-numru ta’ reġistrazzjoni tal-organizzazzjoni.
iv. Kif nista’ nikseb id-dokumenti?
(a)Mingħajr ħlas?
- Tista’ ssir tfittxija elettronika tal-fajl ta’ kumpanija Ċiprijotta, kumpanija barranija, sħubija jew isem kummerċjali billi tittajpja l-isem jew in-numru ta’ reġistrazzjoni tagħhom.
L-informazzjoni li ġejja hija disponibbli mingħajr ħlas:
- l-isem tal-organizzazzjoni;
- id-data tar-reġistrazzjoni;
- it-tip ta’ organizzazzjoni;
- l-istatus tal-organizzazzjoni;
- l-indirizz tal-uffiċċju reġistrat/tal-post tax-xogħol;
- l-isem tad-diretturi eżistenti u tas-segretarju/tas-sħab/tas-sid tal-isem kummerċjali;
- previżjoni tas-servizzi pendenti li għandhom jiddaħħlu fir-reġistru;
- previżjoni tad-dokumenti reġistrati;
- id-data tar-reġistrazzjoni tal-aħħar rapport annwali.
(b)Għal tariffa?
- Għal tariffa ta’ €10, tista’ ssir tfittxija sħiħa tal-fajl elettroniku tal-organizzazzjoni magħżula, fejn l-informazzjoni kollha mdaħħla fir-reġistru mid-data tar-reġistrazzjoni tagħha sad-data tat-tfittxija, u din inkluża, tkun disponibbli.
- Kwalunkwe parti interessata tista’ tikseb ċertifikati / kopji ċċertifikati mal-ħlas tat-tariffa rilevanti.
v. Kif nista’ nikseb estratt mir-reġistru, kopja ċċertifikata jew traskrizzjoni tad-dokumenti?
- Kwalunkwe parti interessata tista’ tissottometti talba għal ċertifikati / kopji ċċertifikati mal-ħlas tat-tariffa xierqa. Iċ-ċertifikati / kopji ċċertifikati jistgħu jinkisbu online, personalment, bil-posta jew bil-posta elettronika.
iii. Il-proċess tar-reġistrazzjoni
i. Kif nista’ nniedi l-proċedura ta’ reġistrazzjoni (kif nissottometti applikazzjonijiet lir-reġistru, ċertifikazzjoni tad-dokumenti, tip ta’ dokumenti li jeħtieġ li jiġu mehmuża)?
(a)Fiżikament
- Il-proċedura ta’ reġistrazzjoni tista’ titwettaq direttament fl-uffiċċju tar-Reġistratur tal-Kumpaniji, mal-ħlas tat-tariffa xierqa.
(b)Online
- Huwa possibbli li d-dokumenti jiġu rreġistrati kompletament online. Sabiex tirreġistra d-dokumenti ta’ organizzazzjoni rreġistrata permezz tas-sistema elettronika ta’ reġistrazzjoni tad-dokumenti, l-ewwel trid tikseb il-kodiċijiet tal-log-in tal-entità kummerċjali inkwistjoni. Il-kodiċijiet tal-log-in jistgħu jinkisbu billi tiġi sottomessa applikazzjoni għar-reġistrazzjoni ta’ organizzazzjoni rreġistrata fis-sistema elettronika fl-indirizz elettroniku li ġej: efilingcodes@drcor.meci.gov.cy
Għal aktar informazzjoni, ara: http://www.companies.gov.cy/en/21-eservices/efiling-of-documents
ii. Kif jiġu eżaminati l-applikazzjonijiet sottomessi?
- L-applikazzjonijiet sottomessi jiġu eżaminati minn uffiċjali tad-Dipartiment skont il-liġijiet u r-regolamenti rilevanti.
IV. L-effetti legali tar-reġistrazzjoni
i. Effett tar-reġistrazzjonijiet fuq partijiet terzi skont l-Artikolu 17 tad-Direttiva (UE) 2017/1132
- Ir-Reġistratur tal-Kumpaniji jtella’ fir-reġistru, f’forma elettronika, l-informazzjoni aġġornata kollha li tispjega d-dispożizzjonijiet tal-liġi nazzjonali li skonthom partijiet terzi jistgħu jistrieħu fuq l-informazzjoni u kull tip ta’ dokument imsejjaħ “informazzjoni obbligatorja dwar l-iżvelar”.«»
ii. Diskrepanzi bejn ir-reġistrazzjoni fir-reġistru u l-pubblikazzjoni tagħha
- Fil-każ ta’ diskrepanza bejn reġistrazzjoni fir-reġistru u l-pubblikazzjoni tagħha skont l-Artikolu 365a(1), il-kumpanija inkwistjoni ma tistax tuża t-test ippubblikat kontra partijiet terzi, iżda l-partijiet terzi jistgħu jinvokawh, sakemm il-kumpanija ma tkunx tista’ turi li l-parti terza kienet konxja tat-test imdaħħal fir-reġistru.
iii. Min huwa responsabbli għall-preċiżjoni tar-rekords?
- Id-diretturi/uffiċjali tal-kumpanija inkwistjoni huma responsabbli għall-preċiżjoni tar-rekords.
V. Proċeduri ta’ protezzjoni tad-data
Skont l-Artikolu 371a tal-Liġi dwar il-Kumpaniji (il-Kapitolu 113), l-ipproċessar ta’ data personali abbażi ta’ dik il-Liġi huwa soġġett għad-dispożizzjonijiet tar-Regolament (UE) 2016/679 u l-Liġi dwar il-protezzjoni ta’ persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data.
VI. Id-dettalji ta’ kuntatt
- Tista’ tikkuntattja lid-Dipartiment tar-Reġistratur tal-Kumpaniji u l-Proprjetà Intellettwali bit-telefown fuq (+357) 22404301 / 22404302, jew bil-posta elettronika fuq eterion@drcor.meci.gov.cy jew deptcomp@drcor.meci.gov,
- jew bil-posta fuq l-indirizz li ġej: Makariou u Karpenisiou, Xenios Building, 1427 Nicosia, Cyprus.